كتبت القاف واشتاقك قصيده
كتبت القاف من جمر التهابه
كتبت القاف وبيوته تليدة
يسطره الشقى واللي شقى به
حرمت القلب طيفك يا فريده
واشوف الوصل والصّدّه تشابه
أشوفك دوم في عيني عنيده
اجيك ابدمع يشكي لك صبابه
لقيت الصّدّ وغيابك يزيده
لضى نار وجحيم ٍ في عذابه
الا يا رجوة القلب ومريده
الا يا متعب ٍ راجي سرابه
تراودني خواطر لي جديده
يترجمها الشقى وسط الكتابه
كسيرة قلب عيشتها وحيده
تخالجها وتنهشها الكئابة
نصحتك في البدا خلك بعيده
ترى قلبي ولو حبك سطى به
يذوق الظيم ما حاف المكيدة
ابفتق لك ضلوعي وشوف مابه
علوم ن في هواجيسي وليده
يشيب ابها ذريب ن في شبابه
يذوق الهم من جرحه عضيده
حميم ٍ ساغه ابتالي شرابه
أنا يا بنت لي قلب ٍ وريده
تقطّع كثر حزنه وأكتئآبه
خذيها في حياتك في قصيدة
نصيحة قلب لو قفى ركابه
جروحك خَفَّهَا لو هي طريدة
ترى تعوي لها بعض الذيابة