يابنت زيدي هجر و ابعاد و غياب
حنا حكمنا عرف ماهو شريعه
احباب لكن طبعنا غير الاحباب
الوصل يشعرنا بمعنى القطيعه
مادام تحكمنا تقاليد و اداب
يعني بلوغ الحلم مانستطيعه
بس اعرفي ياساكنه بين الاهداب
انك بقلبي باقيه بالطليعه
ودي بوصلك بس من وين الاسباب
مالي على كسر الحواجز ذريعه
يعني كذا مالي عن الياس مجناب
لو شلت جثمان المشاعر صريعه
كم طاح من سيف الهوا روس وارقاب
العشق بالعشاق هذا صنيعه
ماشفت بالصده سوا حرق الاعصاب
مردودها بالنفس صدمه شنيعه
بس القدر حكمه على الكل غلاب
واللي سواتي ماله الا يطيعه
دامه حكم في هجر وابعاد وغياب
لازم نطيع الحكم عرف و شريعه